‘‘ตทา ภิกฺขู สมาเนตฺวา, อปุจฺฉิ มุนิสตฺตโม;
‘อิมสฺส อธิการํ เย, สรนฺติ พฺยาหรนฺตุ เต’ฯ
[320]
‘‘สาริปุตฺโต ตทาโวจ, ‘การมสฺส สรามหํ;
กฏจฺฉุภิกฺขํ ทาเปสิ, ปิณฺฑาย จรโต มม’ฯ
[321]
‘‘‘สาธุ สาธุ กตญฺญูสิ, สาริปุตฺต อิมํ ตุวํ;
ปพฺพาเชหิ ทิชํ วุฑฺฒํ, เหสฺสตาชานิโย อยํ’ฯ
[322]
‘‘ตโต อลตฺถํ ปพฺพชฺชํ, กมฺมวาโจปสมฺปทํ;
น จิเรเนว กาเลน, ปาปุณิํ อาสวกฺขยํฯ
[323]
‘‘สกฺกจฺจํ มุนิโน วากฺยํ, สุณามิ มุทิโต ยโต;
ปฏิภาเนยฺยกานคฺคํ, ตโต มํ ฐปยี ชิโนฯ
[324]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[325]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[326]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ราโธ เถโร อิมา คาถาโย
อภาสิตฺถาติฯ
ราธตฺเถรสฺสาปทานํ นวมํฯ
10. โมฆราชตฺเถรอปทานํ
[327]
‘‘ปทุมุตฺตโร นาม ชิโน, สพฺพโลกวิทู มุนิ;
อิโต สตสหสฺสมฺหิ, กปฺเป อุปฺปชฺชิ จกฺขุมาฯ
[328]
‘‘โอวาทโก วิญฺญาปโก, ตารโก สพฺพปาณินํ;
เทสนากุสโล พุทฺโธ, ตาเรสิ ชนตํ พหุํฯ
[329]
‘‘อนุกมฺปโก การุณิโก, หิเตสี สพฺพปาณินํ;
สมฺปตฺเต ติตฺถิเย สพฺเพ, ปญฺจสีเล ปติฏฺฐปิฯ
[330]
‘‘เอวํ นิรากุลํ อาสิ, สุญฺญตํ ติตฺถิเยหิ จ;
วิจิตฺตํ อรหนฺเตหิ, วสีภูเตหิ ตาทิภิฯ
[331]
‘‘รตนานฏฺฐปญฺญาสํ , อุคฺคโต โส มหามุนิ;
กญฺจนคฺฆิยสงฺกาโส, พาตฺติํสวรลกฺขโณฯ
[332]
‘‘วสฺสสตสหสฺสานิ , อายุ วิชฺชติ ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[333]
‘‘ตทาหํ หํสวติยํ, กุเล อญฺญตเร อหุํ;
ปรกมฺมายเน ยุตฺโต, นตฺถิ เม กิญฺจิ สํธนํฯ
[334]
‘‘ปฏิกฺกมนสาลายํ, วสนฺโต กตภูมิยํ;
อคฺคิํ อุชฺชาลยิํ ตตฺถ, ทฬฺหํ กณฺหาสิ สา [กณฺหา สิยา (สี. ปี.), ฑยฺหกณฺหา สิลา (สฺยา.)] หีฯ
[335]
‘‘ตทา ปริสติํ นาโถ, จตุสจฺจปกาสโก;
สาวกํ สมฺปกิตฺเตสิ, ลูขจีวรธารกํฯ
[336]
‘‘ตสฺส ตมฺหิ คุเณ ตุฏฺโฐ, ปณิปจฺจ [ปติปชฺช (สฺยา.)] ตถาคตํ;
ลูขจีวรธารคฺคํ, ปตฺถยิํ ฐานมุตฺตมํฯ
[337]
‘‘ตทา อโวจ ภควา, สาวเก ปทุมุตฺตโร;
‘ปสฺสเถตํ ปุริสกํ, กุเจลํ ตนุเทหกํฯ
[338]
‘‘‘ปีติปฺปสนฺนวทนํ , สทฺธาธนสมนฺวิตํ [สทฺธาสฺเนหสมนฺวตํ (ก.)];
อุทคฺคตนุชํ หฏฺฐํ, อจลํ สาลปิณฺฑิตํฯ
[339]
‘‘‘เอโส ปตฺเถติ ตํ ฐานํ, สจฺจเสนสฺส ภิกฺขุโน;
ลูขจีวรธาริสฺส, ตสฺส วณฺณสิตาสโย [วณฺณคตาสโย (สี. สฺยา. ปี.)]ฯ
[340]
‘‘ตํ สุตฺวา มุทิโต หุตฺวา, นิปจฺจ สิรสา ชินํ;
ยาวชีวํ สุภํ กมฺมํ, กริตฺวา ชินสาสเนฯ
[341]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสูปโค อหํฯ
[342]
‘‘ปฏิกฺกมนสาลายํ, ภูมิทาหกกมฺมุนา;
สมสหสฺสํ นิรเย, อทยฺหิํ เวทนาฏฺฏิโตฯ
[343]
‘‘เตน กมฺมาวเสเสน, ปญฺจ ชาติสตานิหํ;
มนุสฺโส กุลโช หุตฺวา, ชาติยา ลกฺขณงฺกิโตฯ
[344]
‘‘ปญฺจ ชาติสตาเนว, กุฏฺฐโรคสมปฺปิโต;
มหาทุกฺขํ อนุภวิํ, ตสฺส กมฺมสฺส วาหสาฯ
[345]
‘‘อิมสฺมิํ ภทฺทเก กปฺเป, อุปริฏฺฐํ ยสสฺสินํ;
ปิณฺฑปาเตน ตปฺเปสิํ, ปสนฺนมานโส อหํฯ
[346]
‘‘เตน กมฺมวิเสเสน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[347]
‘‘ปจฺฉิเม ภเว สมฺปตฺเต, อชายิํ ขตฺติเย กุเล;
ปิตุโน อจฺจเยนาหํ, มหารชฺชสมปฺปิโตฯ
[348]
‘‘กุฏฺฐโรคาธิภูโตหํ, น รติํ น สุขํ ลเภ;
โมฆํ รชฺชํ สุขํ ยสฺมา, โมฆราชา ตโต อหํฯ
[349]
‘‘กายสฺส โทสํ ทิสฺวาน, ปพฺพชิํ อนคาริยํ;
พาวริสฺส ทิชคฺคสฺส, สิสฺสตฺตํ อชฺฌุปาคมิํฯ
[350]
‘‘มหตา ปริวาเรน, อุเปจฺจ นรนายกํ;
อปุจฺฉิํ นิปุณํ ปญฺหํ, ตํ วีรํ วาทิสูทนํฯ
[351]
‘‘‘อยํ โลโก ปโร โลโก, พฺรหฺมโลโก สเทวโก;
ทิฏฺฐิํ โน [ทิฏฺฐา โน (สี.), ทิฏฺฐํ โน (ปี.), ทิฏฺฐิํ เต (สฺยา.)] นาภิชานามิ, โคตมสฺส ยสสฺสิโนฯ
[352]
‘‘‘เอวาภิกฺกนฺตทสฺสาวิํ , อตฺถิ ปญฺเหน อาคมํ;
กถํ โลกํ อเวกฺขนฺตํ, มจฺจุราชา น ปสฺสติ’ฯ
[353]
‘‘‘สุญฺญโต โลกํ อเวกฺขสฺสุ, โมฆราช สทา สโต;
อตฺตานุทิฏฺฐิํ อุหจฺจ, เอวํ มจฺจุตโร สิยาฯ
[354]
‘‘‘เอวํ โลกํ อเวกฺขนฺตํ, มจฺจุราชา น ปสฺสติ’;
อิติ มํ อภณิ พุทฺโธ, สพฺพโรคติกิจฺฉโกฯ
[355]
‘‘สห คาถาวสาเนน, เกสมสฺสุวิวชฺชิโต;
กาสาววตฺถวสโน, อาสิํ ภิกฺขุ ตถารหาฯ
[356]
‘‘สงฺฆิเกสุ วิหาเรสุ, น วสิํ โรคปีฬิโต;
มา วิหาโร ปทุสฺสีติ, วาตโรเคหิ ปีฬิโต [วาจายาภิสุปีฬิโต (สฺยา. ปี.), วาตโรคี สุปีฬิโต (ก.)]ฯ
[357]
‘‘สงฺการกูฏา อาหิตฺวา, สุสานา รถิกาหิ จ;
ตโต สงฺฆาฏิํ กริตฺวา, ธารยิํ ลูขจีวรํฯ
[358]
‘‘มหาภิสกฺโก ตสฺมิํ เม, คุเณ ตุฏฺโฐ วินายโก;
ลูขจีวรธารีนํ, เอตทคฺเค ฐเปสิ มํฯ
[359]
‘‘ปุญฺญปาปปริกฺขีโณ, สพฺพโรควิวชฺชิโต;
สิขีว อนุปาทาโน, นิพฺพายิสฺสมนาสโวฯ
[360]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[361]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[362]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โมฆราชา เถโร อิมา คาถาโย
อภาสิตฺถาติฯ
โมฆราชตฺเถรสฺสาปทานํ ทสมํฯ
กจฺจายนวคฺโค จตุปญฺญาสโมฯ
ตสฺสุทฺทานํ –
กจฺจาโน วกฺกลี เถโร, มหากปฺปินสวฺหโย;
ทพฺโพ กุมารนาโม จ, พาหิโย โกฏฺฐิโก วสีฯ
อุรุเวฬกสฺสโป ราโธ, โมฆราชา จ ปณฺฑิโต;
ตีณิ คาถาสตาเนตฺถ, พาสฏฺฐิ เจว ปิณฺฑิตาฯ
55. ภทฺทิยวคฺโค